ສີ່ແຂວງທາບທາມຮ່າງກົດໝາຍການກວດສອບແຫ່ງລັດ ສະບັບປັບປຸງ.

         ອົງການກວດສອບແຫ່ງລັດ ໄດ້ຈັດກອງປະຊຸມທາບທາມຮ່າງກົດໝາຍ ວ່າດ້ວຍການກວດສອບແຫ່ງລັດ ສະບັບປັບປຸງ ຮ່ວມກັບອໍານາດການປົກຄອງ 4 ແຂວງພາກໃຕ້ ຂຶ້ນໃນວັນທີ 21 ກໍລະກົດ ນີ້ ທີ່ຫ້ອງປະຊຸມຂອງຫ້ອງວ່າການແຂວງຈໍາປາສັກ ໂດຍການໃຫ້ກຽດເຂົ້າຮ່ວມເປັນຄະນະປະທານຂອງ ທ່ານ ແກ້ວລັດຕະນະ ສີຫາວົງ ຄະນະປະຈໍາພັກແຂວງ ຮອງປະທານຄະນະປະຈໍາສະພາປະຊາຊົນແຂວງ ທັງເປັນສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15 ແຂວງຈໍາປາສັກ, ທ່ານ ບຸນເລີດ ເທບວົງສາ ຮອງປະທານອົງການກວດສອບແຫ່ງລັດ ຜູ້ຊີ້ນໍາການປັບປຸງກົດໝາຍ ວ່າດ້ວຍການກວດສອບແຫ່ງລັດ ມີບັນດາທ່ານຕາງໜ້າຈາກສະພາແຫ່ງຊາດ, ຫ້ອງວ່າການສຳນັກງານນາຍົກລັດຖະມົນຕີ, ກະຊວງຍຸຕິທໍາ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ອົງການກວດສອບປະຈຳພາກໃຕ້ ພ້ອມທັງບັນດາພະແນກການອ້ອມຂ້າາງ 4 ແຂວງພາກໃຕ້ ຄື: ແຂວງາປາສັກ, ແຂວງສາລະວັນ, ແຂວງເຊກອງ ແລະ ແຂວງອັດຕະປື ເຂົ້າຮ່ວມ.

        ໂດຍປະຕິບັດຕາມມະຕິຂອງກອງປະຊຸມສະພາແຫ່ງຊາດ ວ່າດ້ວຍການຮັບຮອງແຜນການສ້າງ ແລະ ປັບປຸງກົດໝາຍ 5 ປີ ຂອງສະພາແຫ່ງຊາດ ຊຸດທີ IX (2021-2025) ສະບັບເລກທີ 19/ສປຊ, ລົງວັນທີ 26 ມີນາ 2021 ແລະ ແຜນການສ້າງ ແລະ ປັບປຸງກົດໝາຍ ປະຈໍາປີ 2022 ຂອງຄະນະປະຈຳສະພາແຫ່ງຊາດ ສະບັບເລກທີ 02/ຄປຈ, ລົງວັນທີ 7 ກຸມພາ 2022. ອົງການກວດສອບແຫ່ງລັດ ຈຶ່ງໄດ້ຈັດກອງປະຊຸມທາບທາມຮ່າງກົດໝາຍວ່າດ້ວຍການກວດສອບແຫ່ງລັດ ສະບັບປັບປຸງ ຮ່ວມກັບອໍານາດການປົກຄອງ 4 ແຂວງພາກໃຕ້ຂຶ້ນ ເພື່ອທາບທາມຄວາມຄິດເຫັນຂອງບັນດາທ່ານການນໍາໃນທຸກຂົງເຂດວຽກງານ ປະກອບເຂົ້າໃສ່ເນື້ອໃນຮ່າງກົດໝາຍສະບັບປັບປຸງດັ່ງກ່າວໃຫ້ມີຄວາມສົມບູນ, ສອດຄ່ອງກັບການຈັດຕັ້ງປະຕິບັດວຽກງານຕົວຈິງ, ສາມາດສະເໜີຕໍ່ສະພາແຫ່ງຊາດພິຈາລະນາຮັບຮອງ ແລະ ນໍາໃຊ້ໄດ້ຍາວນານ ຊຶ່ງໂຄງປະກອບ ແລະ ເນື້ອໃນ ຂອງຮ່າງກົດໝາຍວ່າດ້ວຍການກວດສອບແຫ່ງລັດ ສະບັບປັບປຸງໃໝ່ນີ້ ປະກອບມີ 11 ພາກ, 12 ໝວດ ແລະ 82 ມາດຕາ ກໍຄື ເພີ່ມໃໝ່ 1 ພາກ, 5 ໝວດ, 13 ມາດຕາ ແລະ ປັບປຸງທັງໝົດ 55 ມາດຕາ ຊຶ່ງເຫດຜົນໃນການປັບປຸງ, ເພີ່ມໃໝ່ ແລະ ຕັດອອກ ຂອງບາງພາກ, ໝວດ ແລະ ມາດຕາ ຂອງກົດ ໝາຍສະບັບນີ້ ເພື່ອແນໃສ່ເຮັດໃຫ້ເນື້ອໃນກົດໝາຍ ມີຄວາມຄົບຖ້ວນ, ສົມບູນ, ຮັດກຸມ, ມີຄວາມຮັບປະກັນ, ມີຄຸນນະພາບ ແລະ ສາມາດນໍາໄປຈັດຕັ້ງປະຕິບັດໃຫ້ມີປະສິດທິຜົນ. ກອງປະຊຸມທາບທາມຮ່າງກົດໝາຍວ່າດ້ວຍການກວດສອບແຫ່ງລັດ ສະບັບປັບປຸງ ດໍາເນີນເປັນເວລາ 2 ວັນ ຈຶ່ງສຳເລັດ.

ຮູບພາບ ແລະ ຂ່າວໂດຍ:…